今年聖誕,大家可能要平靜地度過。不過1941年嘅聖誕,大家想平平靜靜地度過都變成奢望,因為呢一年太平洋戰爭爆發,日軍更於聖誕節攻佔香港,令香港要度過三年零八個月嘅惡夢。位於香港島最西面嘅摩星嶺,正是二戰時英軍軍事要塞,聖誕到此一遊,看看牆上彈孔,你就會明白平靜之可貴。

9.2吋炮台 守護香港

早前香港超級馬拉松運動員黃浩輝(輝Sir)便代表「Run For Good」到摩星嶺二戰遺跡。佢推介咗兩條路線,初級組路線由堅尼地城站出發,經域多利道就會到達摩星嶺平房區(又稱為公民村),從公民村旁小徑上山,大概走1公里左右就會到達山頂,如果大家有睇逃學威龍,其中一幕恐怖分子襲擊警察就係喺呢度拍㗎啦。雖然摩星嶺高度只約海拔260米,係香港嘅軍事重地,軍事遺跡處處。

其實只要打開地圖,就會明白摩星嶺嘅重要性,因為維多利亞港西邊出口闊達3公里,比起東面出口大概只得500碼左右,摩星嶺自然需要更強火力守護,所以英國就喺1900年代,於此地打造軍事要塞,設有有營房、指揮總部及火藥庫等設備,更喺山頂至山腰設置59.2吋口徑大炮台,大家上山嘅時候見到有一條好斜嘅石屎斜坡其實就係用嚟運送炮台上山用嘅!二戰期間,炮台發揮作用,成功令日本海軍由頭到尾無辦法進攻香港,日軍進軍香港只由陸軍負責。不過此地被日軍攻陷後,大部分軍事設備都被炸毀,只有炮台等建築物屹立不倒,日後更被列為二級歷史建築。

睇完古蹟,假如大家想kill標(意即到山頂三角網測站打卡)嘅話可以沿小路行100米左右,可以遙望西高西崖,數碼港及南丫島一帶。

超靚白屋 打卡熱點

頭先沿小徑上山,落山就建議大家石屎路,因為其中會經過一個風景勁靚嘅觀景台,大家可以180度欣賞到東博寮海峽,眺望大嶼山喜靈洲及南丫島一帶,天朗氣清時更可遠眺萬山群島

繼續沿石屎路落山,到達域多利道交界,大家就會見到芝加哥大學布思商學院。呢座咁靚嘅建築物前身就係域多利道扣押中心(俗稱「白屋」)。回歸前,呢度係香港政治部專門收容左派分子嘅拘留所,荒廢之後有好多電影都嚟呢度取景,其中色戒入面易先生嘅秘密居所就喺呢度拍㗎啦!2013年呢度正式撥地芝加哥大學響香港設立布思商學院,現時校園內仍保留歷史遺蹟,附有解釋詳盡的展板,疫情過後校園重開,仲入內參觀

摩星嶺之友徑 陡峭有趣味

另外,輝Sir仲推介咗一條高級組路線,就係由堅尼地城站經龍華街到觀龍樓旁樓梯上堅尼地城臨時遊樂場,再從籃球場旁隱蔽小徑上山走絲帶路至摩星嶺徑盡頭逆走摩星嶺之友徑。如果大家想挑戰高難度,於摩星嶺之友徑編號18號後,可以跟住左邊隱蔽絲帶小徑直上標高柱,路經陡峭得來有趣味。上山頂可選擇馬路落域多利道又或者繼續逆走摩星嶺之友徑。

青年旅舍 無敵海景

面對咁靚嘅風景,假如你想睇耐啲,都有方法架!青年旅舍協會(YHA摩星嶺設有賽馬會摩星嶺青年旅舍,其中最大賣點就係向海嘅270度觀景台,可以看到維港、青馬大橋離島區景無論日落或觀星都咁正。旅舍設施方面,有多用途活動室、燒烤場、自助廚房及飯堂,小賣部,紮營的營地等,最重要收費便宜,海景雙人房只需$360!疫情期間,想遠離人潮,大可以嚟呢度放空一下!

部分資料來源:Run for Good(https://www.facebook.com/runforgoodhk)

圖片來源:香港青年旅舍協會、Run for Good


摩星嶺景點位置圖


雖然摩星嶺高度只有約海拔260米,但係香港嘅軍事重地,軍事遺跡處處。


山頂至山腰設置5支9.2吋口徑大炮台。


山上有一條好斜嘅石屎斜坡,其實就係用嚟運送炮台上山用嘅!


除咗炮台,山上仲有營房、指揮總部及火藥庫等設備遺跡,牆上仲留有唔少機槍彈孔添!


大家想kill標嘅話,可以沿小路行100米左右,可以遙望西高西崖,數碼港及南丫島一帶。

日落觀瀾亭以觀看日落和無敵海景聞名,係拍攝日落嘅好地方。

芝加哥大學前身係域多利道扣押中心,又名白屋。


喺芝加哥大學,一樣有無敵海景。

想難度高啲,可以試試逆走「摩星嶺之友徑」。


摩星嶺青年旅舍最大賣點就係向海嘅270度觀景台。


喺呢度,無論睇日落定觀星都一樣咁正!

雙人房乾淨企理,而收費合理。

旅舍內仲設有自助廚房,大家可以玩煮飯仔。