宜家疫情肆虐,喺公眾場所尤其係人多嘅地方除口罩,真係可以話係冒住生命危險,但係,如果遇到性命攸關嘅事都唔理得咁多!內地有名中年男子喺北京地鐵站突然病發暈低,一位女醫生不顧感染新冠肺炎嘅危險,除口罩幫男子做人工呼吸。網民大讚女醫生,但佢表示自己無咩值得表揚,只係做咗應該做嘅事。

據內地媒體報道,12月8號,一名中年男子喺北京地鐵站等車嗰陣突然病發,失去意識。網上有影片顯示,男子之後被平放喺地上,有位年輕女子雙膝跪地幫佢做心外壓。跟住佢除低口罩,幫男子做人工呼吸,直到救護員趕來。

原來呢位年輕女子係張家口一間醫院嘅耳鼻喉科奚醫生,佢憶述,事發當日自己等緊車返屋企,咁啱坐喺患者後排。突然佢聽到男子家屬焦急呼叫,佢見男子望落好瘦弱,但仍然有反應,以為男子只係低血糖,就去買糖。而候車室嘅女職員亦發現情況,即刻聯繫上司,以站內廣播尋找醫護人員。趕返嚟嘅奚醫生即刻試探患者鼻息,跟住幫佢做心肺復甦。大約10幾分鐘後,救護車趕到,男子仍然有心跳。

對於網民大讚自己不顧危險除口罩救人嘅事,奚醫生話:「換做其他醫生,也會這麼做的。這是應該的。」至於被問到會否擔心因此感染新冠肺炎,奚醫生指自己係女仔,戴口罩吹氣可能吹唔入,而且當時情況緊急,根本考慮唔到咁多。佢仲話:「如果我感染了新冠肺炎,還有治癒的機會;如果這名患者錯過了最佳搶救時機,後果就不堪設想了。」

圖:網上圖片