聖誕節本應是普天同慶嘅日子,不過喺1953年嘅聖誕節,好多人就未必笑得出啦!當年聖誕節一場大火,令無數人流離失所!而呢場大火亦改變咗唔少人嘅命運,因為大火令港英政府決定興建徒置區,再慢慢演變成後來嘅公屋!想了解美荷樓多一啲?依家透過「AR!從前有個美荷樓!」網頁,就可以走入美荷樓,感受當年嘅生活啦!

AR!從前有個美荷樓!

位於石硤尾嘅「美荷樓生活館」,透過模擬單位、3D攝影區和超過1200件歷史展品,讓大家認識上世紀50-70年代石硤尾區及當時住在徙置區、廉租屋人士嘅生活故事。館內仲結集咗舊居民嘅訪問,加上居民捐贈嘅舊物件展品,還原多個當時公屋嘅生活場景,令人細味到當年艱苦但美好嘅歲月。

雖然因為疫情關係,「美荷樓生活館」暫停開放,但佢哋同Hang Seng University of Hong Kong- BACCI 合作嘅AR活動網頁「AR!從前有個美荷樓!」剛剛面世,透過網頁,大家就可以將氹氹轉、穿膠花、甚至一屋兩伙五人行等等嘅情景活現眼前之外,而每件作品亦附上相關嘅背景介紹,仲有同學精心挑選美荷樓附近嘅社區熱點等資訊添!

網址:https://onceuponartime.hsu.edu.hk/zh/%e9%a6%96%e9%a0%81-2/ 

美荷樓生活館FBhttps://www.facebook.com/HeritageMHH

石硤尾邨 安置流離失所家庭

原來美荷樓及石硤邨嘅出現,同一場大火好有關係!1953年聖誕節,木屋住戶燃點火水燈時不慎燒著棉胎引起大火,不足10分鐘,大火已波及數百戶。到晚上個白田村已被焚毀,直至翌日凌晨火勢受控。大火波及多個木屋區,災場廣達41英畝, 5萬多名居民頓失家園。

1954年落成嘅石硤尾邨,就係為安置因大火而流離失所嘅家庭而興建,後來為咗改善居民生活,石硤尾邨被清拆重建,只有美荷樓被列為二級歷史建築而保留落嚟,2013年改建成青年旅舍,內裏更設有美荷樓生活館,讓大家重拾當年徒置區、廉租屋嘅點點滴滴。

一家九口 住在120呎單位

而家大家住200呎單位叫蝸居,其實當年徒置區、廉租區嘅居民,往往一家幾口住喺不足200呎單位內,但當年嘅人並不以此為苦!徐連歡(歡姐)不但係美荷樓「原居民」,亦經歷過石硤尾大火,當年只有5歲嘅她,一家六口搬到120呎嘅家,歡姐記得:「有屋可住、有瓦遮頭,唔使擠在路邊鐵皮屋,相比起來,面積120呎也覺得很大了。」

雖然生活空間擠迫,但他們一家依然好滿足:「我哋七兄弟姊妹,起初搬嚟時四個,後來多咗三個,我們就搭建一個閣仔,女孩喺閣仔瞓,男孩喺地下睡,唔夠地方,就瞓喺帆布床,晚上搭,朝早拆,活動空間就會增加。」喺歡姐腦海中,石硤尾邨嘅生活只有快樂嘅回憶:「抽獎贏了一部電視機,高興得不得了,我哋會喺大門入口嘅位置,坐喺椅子睇,或企住睇。」

歡姐走進「美荷樓生活館」,覺得裡面嘅陳設同佢嘅舊居有九成相似。對於兒時往事,佢依然記憶猶新:「我最記得養小雞,我們嘅剩飯、米粒,小雞會啄食,當聽到『房署人員』嚟,我哋就將小雞捉返入籠中,否則佢哋會用網捉小雞,捉到就會被充公。」

當時「美荷樓」設備簡陋、每層三百多人共用六格廁所、九人住在120呎嘅單位,若以今日標準嚟睇,環境可算惡劣,但是歡姐從來無抱怨。「以現時嘅角度睇,真係唔及格,但我哋不會埋怨,唔會問點解其他人有錢但我哋窮,只有一個期望,將來可以住得更好。」

難忘新年蘿蔔糕 中秋燒烤

90年代先搬到美荷樓嘅文月英,亦係美荷樓最後一批居民,對呢度嘅生活都好懷念:「每年新年,左鄰右里會主動嚟派『利是』,仲會送上熱騰騰嘅蘿蔔糕!」「中秋節時鄰居會大廈地下燒烤,好高興架!

文月英一家本來住喺深水埗嘅天台屋,環境惡劣。佢表示,雖然當時美荷樓喺其他人眼中已經好殘舊,但佢哋得知獲安排入住時,大家都萬分期待。「屋頂不再漏水,我也有自己嘅床、自己嘅書枱。窗外有山,每天早上雀仔嘅歌聲叫醒我,晚上微風送爽,仲唔係豪宅?」

美荷樓喺70年代陸續改善設施,單位設有獨立廁所,居住面積擴大。文月英一家六口住喺360呎單位,佢認為間隔比私人樓宇更實用。「房間可以放兩張『碌架床』、兩個大衣櫃,還有地方放得落兩張書枱添!」

相片來源:美荷樓生活館、香港青年旅舍協會


美荷樓生活館同Hang Seng University of Hong Kong- BACCI 合作嘅AR活動網頁「AR!從前有個美荷樓!」剛剛面世啦!


Click入網頁,大家就可以將一屋兩伙五人行等等嘅情景活現眼前!

石硤尾木屋區大火因一所木屋住戶在燃點火水燈時不慎燒著棉胎引起,大火波及多個木屋區,災場廣達41英畝,五萬多名居民頓失家園。


於1954年落成嘅石硤尾邨,就係為安置因大火而流離失所嘅家庭而興建。

《工商晚報》在1954年報導,建築中2座的6層徙置大廈,已建至3樓,全部均以三合土鋼筋建築,每間房間面積為縱橫各10尺,建築外型成「H」英文字母。


佔地兩層嘅生活館,透過模擬單位、3D攝影區和超過1200件歷史展品,讓大家認識上世紀50-70年代石硤尾區及當時住在徙置區、廉租屋人士嘅生活故事。


生活館重現50年代和70年代原間隔單位面貌。

當年一家幾口住喺120呎嘅單位,但大家都已經好滿足!


當年並無獨立廁所,每層三百多人共用六格廁所。

廚房就設喺走廊,大家出入都好唔方便。


當年大家最佳娛樂,自然係打番幾圈啦!