婆媳關係一直以來都係千古難題,嫁到去一個陌生家庭,最難得就係遇到一位好奶奶。有位台灣女網民喺網上分享佢嘅絕世好奶奶,指奶奶唔止幫佢湊女,喺親戚面前仲係佢嘅最強後盾。但網民一直唔明點解奶奶每月收2.5萬台幣(約7000港幣)咁多家用,直至近日丈夫急需一筆錢,奶奶一下子就拎到出來,佢先明白原來奶奶一直將之前嘅家用儲起,分文不取以備不時之需,令佢感動大讚奶奶「讓人無可取代,連我的親媽都不及她」。

網民喺facebook專頁「靠北婆婆2.0」發文分享,佢嘅奶奶「沈穩、不道人長短、更不會抱怨」,仲會讚佢捱得苦,認為係自己個仔有福氣先娶到佢。奶奶會體諒佢嘅辛苦,每日網民返到屋企都會抱抱佢,同佢講「辛苦了」。喺親戚面前,奶奶仲會挺身護佢:「她是我兒子的老婆也就是我們的人,我當然要挺她。」總之,奶奶對佢嘅好,連奶奶嘅親生女都會吃醋。不過,網民就一直都唔明,點解奶奶每月要收佢2.5萬台幣咁多家用。直至有一次,網民老公急需一筆錢起倉庫,奶奶即刻問:「100萬夠嗎?」網民先知原來奶奶將佢哋嘅家用一蚊一蚊咁儲起,以備不時之需。網民最後感謝奶奶嘅付出,更希望佢可以長命百歲睇孫女著婚紗。

好多網友紛紛留言,都羨慕網民有位好奶奶:「別人的婆婆總是不會讓我失望」、「這根本中樂透好嗎」、「妳婆婆還有其它兒子嗎」,仲叫網民好好珍惜呢位好奶奶。

圖:網上圖片