近日Facebook專頁StartChing分享,早前見到一位輪椅人士遭巴士司機拒載形,好彩有一位女乘客仗義執言,輪椅人士先有得上車,引起網民熱烈討論。 

根據StartChing分享,當時一名輪椅人士就喺荔枝角等緊巴士,排隊頭位置,但當巴士到站後,司機就企起身同輪椅人士講︰「唔好意思呀!嗰位(輪椅位)擺咗兩架BB車啦,上唔到啦,無位上呀。」輪椅先生不滿表示,「嗰個位我哋專用㗎喎,點解唔俾我上?又要等過下一班!」 

巴生司機又表示,「唔係呀,人哋有兩架BB車,人哋係車,你又係車,唔係我唔想俾你上,係真係無位呀」。有一位女乘客睇唔過眼就話,「已經唔係第一次,我投訴過」。司機就堅持話係因為冇位先唔俾輪椅先生上車。最後,女乘客就反駁,「咁你叫返佢哋拎開啲BB車咪得囉?嗰位係人哋(殘疾人士)專用」。司機先轉頭對車箱講,「邊個㗎,拎一拎開啦」。

經過一番爭執同擾攘,BB車終於放好應擺放嘅位置。隨後,司機就拎住踏板放到車門上俾輪椅先生上車。 

對此,就有網民留言話,「善待社會上有需要的朋友,不要袖手旁觀任讓弱勢社群被欺凌」,更有輪椅用者留言「經常遇到此事有苦自己知不過都好感激仍有不少熱心市民願意幫忙」,又有網民讚女乘客「好嘢、有義氣」,亦有不少網民表示司機係有責任唔俾人放雜物喺輪椅位置,而且該位置係輪椅用者優先。

圖片來源︰Facebook@StartChing