出街唔覺意跌咗個銀包梗係又心急又肉赤,最慘係銀包入面無任何聯絡地址、方法,就算有好心人執到都好難搵得返。台灣有位好心人執到個銀包,入面都係無失主嘅任何聯絡方法,但佢用咗個迂迴嘅方法通知失主,最後成功歸還銀包更加唔收任何酬勞,不求回報。

有外籍網民喺facebook群組「Foreigners society in Taiwan 臺灣外籍劇團」發文指,自己喺台北車站附近唔小心跌咗個銀包,入面有現金、銀行卡等重要文件。但佢一直無發覺銀包唔見咗,直至佢夜晚返屋企收到銀行來電。銀行職員話佢知,有人執到佢張銀行卡,希望同佢聯絡,但基於客戶私隱,銀行職員無透露佢嘅聯絡方法俾好心人知。而好心人就留低自己嘅電話號碼,等銀行聯絡失主。

網民話佢收到銀行電話之後先發現自己唔見銀包,立即致電好心人,不過對方表示已經收工、離開咗店舖,於是兩人相約翌日見面交收。而第二日一早,網民就成功搵到好心人拎返銀包,佢本來想支付車費或請佢喝杯咖啡,甚至擁抱一下,但對方只係一臉「ok bye」嘅表情,仲急急腳走人,網民最終只來得切同佢講咗聲「謝謝」。

圖:FB@ Foreigners society in Taiwan 臺灣外籍劇團