流浪嘅人背後都有不為人知嘅原因,浙江溫州有位流浪伯伯,每日都會用自己手繪嘅紙幣去麵鋪買麵,而麵鋪嘅老闆亦好配合,照收佢張手作紙幣,「賣」食物俾伯伯。佢哋交易嘅片段仲喺網上瘋傳,網民大讚老闆夫婦嘅善舉。

短片見到伯伯拎住好明顯係假鈔嘅手繪紙幣去買麵,老闆娘睇都唔睇就裝好一袋麵俾佢。而呢張假鈔竟然係人手繪製嘅百元大鈔,上面用顏色筆畫咗各種圖案同文字。麵鋪老闆接受採訪嗰陣表示,流浪伯伯係佢哋嘅「忠實顧客」,每日都會去佢哋鋪頭買麵,風雨不改至今已有7年,甚至中途佢哋搬咗2次鋪,伯伯依然有辦法得知,第一日開張就去幫襯。有時伯伯有錢嗰陣就會俾1、2蚊人民幣買麵,一無錢就用手繪紙鈔。不過老闆話,無論伯伯有無錢,老闆娘一樣照賣麵俾佢,仲話:「照顧一下流浪老人是我們應該的」。佢仲指,伯伯畫嘅紙鈔畫功精細,多年來收到嘅假鈔從來無一張嘅圖案係重複嘅,佢哋認為「流浪漢看起來是有文化的,他應該也是個有故事的人」,所以一直以來都無拆穿伯伯,每次都交足戲交易。 

唔少網民大讚麵鋪老闆夫婦:「積德行善必有好報」、「老闆夫妻都是好人」。不過亦有網民持相反意見:「這不是善良,你反而害了他,自然界優勝劣汰,他有手有腳卻不工作」。

圖:網上圖片