越來越多人重視特殊教育需要（SEN）幼童，為咗令有需要嘅SEN幼童可以及早喺黃金期接受言語治療，中大語言學及現代語言系手語及聾人研究中心就開設咗「樂語路」網上語言發展平台及訓練計劃，俾父母可以喺屋企輕鬆訓練子女發音、詞組、句子等，打好語言發展基礎。

「樂語路」平台喺2017年開展，獲得約1,500萬共兩期嘅資助，暫定營運到2023年。平台提供一站式免費服務，包括網上語言發展資訊平台、語言發展遊戲應用程式，又設有家長工作坊及講座，教授詞彙、發音等親子互動技巧。另外，亦特別為低收入家庭、評定有言語障礙的兒童，提供個別五堂嘅語言治療，幫佢地過渡至政府服務，目前大約有1.3萬名家長受惠。

六歲前係學習語言嘅黃金期，言語治療師莊鳳慈表示，語言障礙成因有好多，小朋友喺學前階段及早得到適當治療，可以大大改善情況，打好語言根基，對日後邏輯思維發展有幫助。

圖片來源︰Facebook@樂語路 Speak Along及網頁擷取

（樂語路網頁擷取）