好多人都話喺香港做作家好難,而要做一直寫作嘅作家就更難,但係金鈴就做得到。金鈴細細個已經好鐘意寫作,但佢覺得做職業作家會好似民國時期嘅作家咁潦倒,所以佢就搵咗一份自己鐘意嘅工作——護士嚟做正職。不過,金鈴從來都無放棄過寫作,反而爭取喺工餘時間寫作,至今共發表咗48個作品。

金鈴除咗係護士、作家之外,仲係一位攝影師。由10歲起,金鈴就開始影相、處理圖片,同時亦培養咗佢嘅構圖能力、藝術觸角。佢認為攝影同寫作有個共通之處,就係「去蕪存菁」,但同時兩者又好唔同,攝影比較反映真實,而寫作就可以塑造虛幻。十幾年前,當旅遊書仲未好似宜家咁出到成行成市嘅時候,金鈴已經出版咗佢嘅第一本遊記。之後,金鈴更喺遊記中加入自己親手影嘅相,俾嗰啲無機會去當地嘅讀者一睹其迷人風貌。只不過,對比起遊記,金鈴更加鐘愛寫小說,但係佢唔想寫好似其他人一樣嘅小說,於是獨創咗最適合佢嘅旅遊小說,開創咗旅遊小說嘅先河。

唔少年輕人都好想好似金鈴咁入行做作家,金鈴坦言自己運氣唔錯,因為有護士嘅工作,唔使依賴寫作維生,令佢可以寫自己鐘意嘅題材。但佢嘅幸運並非偶然,而係多得佢唔怕吃苦、唔怕蝕底嘅性格。金鈴入行前就經常做一啲無酬勞嘅工作,參與編輯、出版等,亦因此佢由別人身上學到唔少知識。對於想入行嘅年輕人,金鈴有3個建議:第一就係多睇書,所謂嘅睇書並唔係純碎上網搜尋自己喜歡嘅文章,而係多涉獵唔同範疇嘅書籍、開闊自己眼界;其次就係要多寫,初初開始寫作,宜從短篇、中篇入手,或者只係寫下隨筆,先練好自己支筆;最後就係要多觀察身邊事物,咁先可以將作品寫得細致入微。當然最最重要嘅係睇大家「肯唔肯堅持」,因為你一直寫作、默默付出,就總會有人睇到。

香港人總係好忙,覺得時間唔夠用,作為護士嘅金鈴亦如是,不過佢懂得好好分配自己嘅時間,做好每一個角色。金鈴話自己係一個好鐘意跟住時間表做嘢嘅人,如果佢放假決定咗留喺屋企寫書,就一定唔會約朋友出街、買嘢之類,超級自律,難怪可以同時身兼多職!

圖:受訪者提供

(金鈴的作品)

(金鈴經常出門旅行,這是她去年和朋友去亞美尼亞攝影金秋

2017年獲選為香港書展年度作家

在香港會議展覽中心,展出十多年來的文學作品及手稿,近百次公開活動圖文資訊,別具意義之紀念品和文學及藝術獎項等等

2020年最新作品,一個關於雪國的故事