好多小朋友生日都期望收禮物食大餐，美國一名8歲男童就恰恰相反，願望係將禮物變成100個薄餅送俾無家者。男童嘅一番善意都感染埋薄餅店老闆同家人，充滿童真嘅佢仲話「我想藉生日幫助有需要嘅人，每個人都中意食簿餅」。

 根據美國WSOC TV報道，扎兩條小辮嘅男童Kieng Rivens居於北卡羅萊納州夏洛特市，上個禮物六（5日）迎來8歲生日。生日前夕男童媽咪Antiqua Ramsey問佢想要咩生日禮物、想點過，佢就提出想喺露宿者聚集嘅帳篷區派發薄餅，令一班無家者可以得到溫飽。

仔仔嘅生日願望令媽媽感到又意外又感動，於是Antiqua開始聯絡幾間薄餅店，睇吓買100個薄餅會唔會有折扣。其中一間薄餅店就覆佢︰「願意捐贈75個薄餅」，而且會帶埋員工同佢地會面，一齊派薄餅。

薄餅店老闆及員工都被Kieng嘅善心觸動，希望可以參與其中出一分力。喺Kieng生日嘅禮拜六朝早，薄餅店「Papa John's Pizza」加盟店嘅老闆Gage Lock同佢嘅同事帶黎咗100個薄餅。Gage表示︰「這是一個7歲小朋友嘅生日願望，只想喺佢8歲生日當日回饋社會」，令Gage想做更多。

Gage又指，多數小朋友生日禮物係想要電子遊戲、玩具、單車等，但Kieng就想喺生日幫助有需要嘅人，好有意義。

喺疫情下，Kieng同家人、朋友、薄餅店員工都戴上口罩，一齊派發薄餅發揚善心。Kieng表示，想借生日幫人，相信每個人都中意薄餅，「我已經擁有很多，所以也想給無家者一些東西」。

圖片來源︰WSOC TV報道影片中擷取

媽媽Antiqua聽完仔仔講嘅生日願望好感動，仲話忍唔住眼濕濕。

薄餅店老闆Gage話聽完小朋友嘅生日願望，都忍唔住自己同叫員工派埋一份。

Kieng同媽媽一齊拍住上！

無家者居住嘅地方。

薄餅店「Papa John's Pizza」帶咗100個薄餅到露宿者聚集嘅帳篷區。