每年12月聖誕連新年長假,都梗有好多香港人要返「鄉下」睇睇,可惜今年遇著新冠肺炎,親身去日本旅行就無乜可能架啦,不如一齊「眼睛去旅行」實際啲。香港公開大學李嘉誠專業進修學院由12月開始,定期舉行「細說日本都道府縣之最」,用虛擬旅行同網上講座,免費帶大家遊日本,一解思鄉之苦。

活動由香港公開大學李嘉誠專業進修學院日本語言暨文化研究中心舉辦,將邀請日本都道府縣好似熊本縣、沖繩縣同日本旅遊局等代表,以網上Zoom形式介紹各地特色,仲設有有獎問答遊戲添。打頭炮嘅係四國高知縣,節目走訪咗高知観光名所「Hirame市場」,同介紹當地美食。活動暫定每個月一至兩次,直至明年11月,任何人都可以免費參加,錯過咗仲可以喺網上重溫。

圖:FB@OUHK Lipace Japanese Language and Cultural Studies Centre