第四波新冠疫情來勢洶洶,喺新一輪嘅社交限制措施下,原本將喺年底舉行嘅「創新科技嘉年華2020」亦轉做網上形式。由12月23號至31號期間,「創新科技嘉年華2020」將會呈獻一系列網上展覽、工作坊同講座等多項精彩活動,等市民親身體驗創新科技對生活帶來嘅便利同樂趣。

今年嘅嘉年華約有50個本地大學、科研機構同企業等單位,透過虛擬展館,展出極具本地代表性嘅創新科技發明同科研成果,包括香港城市大學展出嘅「被動式輻射製冷塗層」、「智能地質監測系統結構」同航空管制遊戲「Airliner」等。而網上講座主要以Zoom軟件進行,主題涵蓋2019冠狀病毒病、綠色減碳、生活技巧創新等開放俾公眾免費收睇。

至於停課在家嘅中、小學生們,仲可以同家長一齊參加嘉年華嘅工作坊,學習設計模型、製作電子聖誕心意咭等,咁就唔驚放假喺屋企會悶喇!不過因為名額有限,大家要先上網預約自己心儀嘅講座、工作坊,個別工作坊更可能需要特定嘅學習套件要先申請領取,詳情請參閱:https://enroll.innocarnival.hk/

圖:官網