香港一向欠缺運動劇,獲好評嘅更係少之又少,不過近期Stephy主演嘅《男排女將》卻令人改觀!呢套劇受到注目,一方面因為女主角Stephy本身真係排球女將,仲入過選香港青年隊,另一方面,劇中嘅力圖隊係以真實嘅球隊力臻為藍本,資料搜集充足,自然令人睇得特別投入!

身材矮小 鬥志彌補

跟《男》劇一樣,力臻男子排球隊嘅球員平均身高較矮,而教練同樣係女性,不過,原來該隊主力早喺兩年前已經退役,而教練葉鳳儀亦都一齊退役,現時嘅教練係卓賢,佢本來係球隊隊長,早喺球隊初創時已經喺隊中,兩年前鳳儀退役後接任做教練。

卓賢同我哋講番球隊嘅歷史,原來力臻喺2006年成立,當時一班天水元朗打學界嘅球員,本本跟隨甲一球隊做梯隊,練咗一段時間之後,梯隊取消,於是佢哋決定自行組隊。當時球隊未有教練,於是佢哋搵嚟其中一位隊員嘅中學教練鳳儀嚟任教,而呢次亦係佢第一次執教球會。

欠缺資源 外間嘲諷

雖然力臻主將都比較矮小,平均只有1.7米左右,但呢支兄弟班表現令人刮目相看,組隊5年就由丙組升上甲一。卓賢解釋球隊成功之道:「力臻重視紀律,我哋有好多規矩,包括球員要準時出席,裝備、基本功都要執得正,而且每星期到大球場練體能。」另外,卓賢又話,由於球隊身高輸蝕,所以鳳儀集中練技術,強調團體精神。而球隊隊名亦係鳳儀所改:「力臻」完美,既然先天性有限制,就靠精神和心態去彌補。

力臻看似一帆風順,但其實當中都面對過唔少困難,由於球隊並無班主,欠缺資源,喺剛開始嘅時候,一切由零開始,無論Book場、買波、添置設備,報比賽,全部都要大家親力親為!「Book場要45點起身,鬥快去排隊,甚至要喺街瞓通宵!」而呢種球隊爭Book場嘅苦況,亦喺《男》劇中重現!

欠缺資源之外,佢哋仲要面對外間嘅冷言冷語,卓賢憶述,聽過有人講:「咁矮,點打都無用啦!」「練咁多體能都係咁!」另一方面,亦有一啲人睇小女教練,甚至暗地質疑:「佢得唔得架?」

面對抨擊同白眼,力臻並無被打沉,卓賢認為,最重要係堅持自己本身嘅精神,而佢亦慶幸有唔少球迷都識得欣賞佢哋呢支講求戰術、技術較細膩嘅球隊。卓賢最難忘嘅一場比賽,並非任何一場爭標賽,而係當年丙組區賽,當時對手高大、壯健,平均年齡約三十多歲,喺比賽中不斷用眼神同言語恥笑佢哋,鳳儀喺場邊提場,佢哋又冷嘲熱諷,鳳儀喺暫停時好嬲,同球員講:「你哋同我打贏佢哋!」結果佢哋化憤怒為力量,最終反敗為勝,呢樣正好反映力臻的精神!

卓賢仲話,作為女教教練,鳳儀有佢嘅優勢,首先佢樣樣都好細緻,一絲不苟,反而男教練可能會比較粗心大意!而且佢會苦口婆心,不斷哦你,「好似阿媽教仔,而呢種方法教年輕球員係好有用嘅!」卓賢表示。

寄語年輕球員 放下自我

經歷全面改組之後,力臻現時目標係男子甲一冠軍,希望能達成上一代未能做到嘅理想,「新一代質素比以前好,而球隊嘅資源亦改善咗。」卓賢表示,呢一兩年,球隊重點發展梯隊,現時有5隊波,達100人,希望培訓多啲年輕人打排球。另外,為咗推廣球隊,近期佢哋亦開咗IGAspiring_volleyballteam),吸引年輕人注意。

卓賢又表示,近年排球運動比以前普及,「以前男仔打排球,會俾人哋會笑話『人妖打排球』(來自一套戲名),現時傳媒多咗報道,大家對排球認識亦多咗。」但與此同時,好多年輕球員擁有嘅嘢亦比以前多,反而未必好似以前咁珍惜!「以前有報紙報導就好開心,現在大家經常上到FB及傳媒;以前球員願意捱,比較專注,現在大家比較自我多了少少,要慢慢教好他們。」佢期望年輕球員能夠「放低自己多少少,為球隊諗多啲!」一起貫徹力臻精神。

圖片來源:力臻男子排球隊


《男排女將》就係以力臻排球隊為藍本。

力臻排球隊喺葉鳳儀教練帶領下,五年內由丙組升上甲一。

力臻重視體能,每個星期都會練一課體能。


當年甲一全部都係男教練,葉鳳儀帶領力臻打甲一,面對唔少冷言冷語。

卓賢本來係球隊隊長,兩年前接棒做教練。


新一代力臻重點發展梯隊。