讓路俾消防、救護車是常識吧?但就有屋苑保安唔合作,以唔可以隨便開閘俾車入內為由拒絕俾救護車駛入,最後要救護員拎住裝備跑入去救人,網民紛紛派嬲,質疑保安嘅做法有問題。

有網友喺facebook專頁「馬路的事討論區(常理版)」發文指,見到有架跨區救護車兜咗兩圈都搵唔到大廈入口,好在有幾個熱心街坊引路去屋苑消防通道閘口,跟住救護員就攞開路中間嘅雪糕筒,要求閘口保安員開閘俾救護車駛入。門口嘅保安就Call保安室,但保安室就唔係即時叫開閘,反而叫門口嘅保安員記得要問清楚救護員去邊座、邊個單位。保安仲話呢道閘唔可以隨便開俾車入,救護員解釋佢哋係入去救人,點知個保安都係唔肯開,仲叫佢哋行旁邊嘅行人閘出入。救護員無奈表示:「咁你希望個傷者平安無事啦!」最後救護員惟有攞齊所需裝備跑住入去搵嗰棟大廈。

網友文末更表示,救護員入屋苑嘅時候無保安員帶路,慨歎:「有咁嘅管理處,唯有希望嗰個屋苑唔好有火警,同埋居民身體健康」。網民紛紛回應,保安同管理公司嘅做法有問題,要求網友公開屋苑名,集體投訴該屋苑。

圖:FB@馬路的事討論區(常理版)