正所謂:家有一老,如有一寶,老人家往往多才多藝,只係未被發掘。最近社企銀杏館成立手工小組,等老人家發揮手藝,縫製聖誕掛飾喺店內寄賣,希望可以幫老人家賺到小小有尊嚴嘅零用錢。

銀杏館喺社交平台發文指,有位80歲嘅基層婆婆,住喺板間房,主要靠長者生活津貼維生,平時都會去執紙皮幫補開支。婆婆每日都會去油麻地店領取「福飯」,佢早前加入咗銀杏館新成立嘅手工小組,同其他「飯友」齊齊製作聖誕手工掛飾。雖然婆婆係第一次參加手工小組,但佢有縫紉根底,唔使點教,一坐低就連續做咗兩個幾鐘頭,期間無停過手,一直默默低頭趕工。

義工講笑咁話以為婆婆太攰瞓著咗,不過原來佢早就靜靜雞縫好一個星星掛飾,仲縫得非常漂亮、細緻。而呢啲長者製成嘅掛飾將會擺喺《銀杏士多》寄賣,扣除成本後所有收入都會轉交俾製作者。婆婆聽到自己嘅手作仔有機會賣到錢之後非常雀躍,話:「執紙皮一日都未必賺到二十蚊,如果縫公仔可以賺到錢就梗係好啦……」銀杏館喺文末表示,製作手工飾物除咗可俾婆婆發揮潛能,更重要嘅係令佢賺到一啲有尊嚴嘅零用錢。

圖:FB@銀杏館