新冠肺炎疫情肆虐下,重挫全球經濟,基層人士嘅生活就更加艱難。而意大利一位76歲嘅麵包鋪老闆Gianni Bernardinello喺疫情期間,堅持每日擺麵包喺店外嘅食物籃,等基層同有需要人士可以自取免費麵包。可惜呢位愛心伯伯喺今個月頭亦已經染疫身亡,佢嘅囡囡接手麵包鋪嘅同時,亦會延續佢嘅善心:「爸爸說有能力就應幫助別人,永遠有人需要麵包。」

Gianni喺開麵包鋪之前曾做過金匠學徒、時裝攝影師、紗線生意,後來佢想賣一種「人們永遠需要的東西」,於是佢諗起麵包,開咗麵包鋪,仲由零開始學搓麵團整麵包、薄餅、麵包、餅乾、糕點等。而喺今年3月,Gianni眼見疫情影響唔少人嘅生計,於是開始喺麵包鋪外擺食物籃,入面放滿麵包、薄餅、糖果等食物,仲寫住:「給有需要的人伸出援手,歡迎自取,也別忘了留一點給別人」。Gianni每次擺低食物籃後就急急腳離開,驚其他人見到佢喺度怕尷尬而唔敢拎麵包。

雖然Gianni話只係將夜晚賣唔完嘅麵包免費贈人,但佢嘅客人兼朋友Alessandra De Luca就表示,曾親眼見到Gianni將新鮮出爐嘅麵包放喺食物籃內,可見呢位老人家對基層嘅關愛。

圖:FB@Bernibistro