本港第四波疫情令人人心惶惶，與此同時都有唔少市民到郊區遊玩散心，但就冇好好保持郊區清潔。有網民（28日）喺社交網集上傳咗一張東龍島垃圾遍地嘅圖片，眾多網民睇到忍唔住俾嬲嬲。亦有網民拍攝咗一段影片，片中有多個露營帳篷駐扎，有網民留言揶揄話「唔知以為係難民營」，又有指「東龍島露營群組之誕生」，擔心人群聚集會增加傳播病毒風險。

網民Pauline Chan喺Facebook行山群組上傳一張於周五（27日）拍攝東龍島公眾碼頭滿地垃圾嘅相，相中可見，垃圾桶唔夠裝，加上膠袋冇綁實，好多垃圾倒瀉出黎，如膠樽、啤酒罐等，衛生情況惡劣。

 Pauline表示，「昨天第一次去東龍島，這是我對東龍島的印象，成張睡袋亦是垃圾，其實帶走自己垃圾真的那麼困難嗎？weekend咪仲恐怖？」唔少網民留言直斥遊人自私及無公德心，又批評遊人「離晒譜，破壞大自然」。

（YUKIE LEUNG影片中擷取）

此外，網民YUKIE LEUNG（28日）亦都有喺Facebook攝影群組上載喺東龍島拍攝嘅影片，片段中可見整個山頭都係大大小小嘅露營帳篷，令人寸步難行，佢形容「其實想走近懸崖邊要攝左攝右…仲要望住個地下行…如果唔係被營繩click親」，而佢就話現場比預期乾淨，呼籲大家繼續愛護香港。

圖片來源︰

Facebook: Pauline Chen@香港行山路綫及資訊谷; YUKIE LEUNG@香港風景攝影會