受疫情影響之下,好多老友記冇得日日去茶樓飲茶,唔多唔少都令佢地生活失去咗啲樂趣。近日就有一間長者日間護理中心為咗氹老人家開心,就將中心飯廳打造成茶樓,仲有埋推車仔,又真係估佢地唔到喎!

鄰舍輔導會26日喺Facebook專業發佈咗一張相,話想接受照顧嘅老友記可以繼續享受熟悉嘅社區生活,機構同事為此花咗好多心思。該中心係位於屯門欣田邨嘅林心雲伉儷長者日間護理中心,相片中可見,中心牆上貼咗龍鳳同雙喜字樣嘅裝飾,工作人員着住圍裙推住銀色點心車(錫紙改裝),一籠籠點心送上,點心有奶皇包、叉燒包、珍珠雞、燒賣及蝦餃,老友記就坐住張加設咗透明膠板嘅圓枱,並維持四人一枱,十足十成個茶樓咁,但只要細心睇吓,就會發現凳及地板同茶樓有分別。

呢個post隨即得到唔少網友激讚,對中心願意打造咁逼真嘅茶樓環境表示欣賞,大讚中心職員「有心思好窩心」、「好關心長者需要」,令長者可以喺疫情下依然可以「嘆茶食點心」,仲有留言話「看見牆上的龍鳳圖,加上點心車,真的像小時候跟爸媽去飲茶」。

圖片來源︰Facebook@鄰舍輔導會