由於疫情關係,多咗人叫外賣,香港大部分商廈叫外賣都可以直接送到公司門口,但原來廣州好多商廈叫外賣都要自己落樓下拎,一到食飯時間高峰期,打工仔等lift、上上落落拎外賣都要成十幾分鐘,非常不便。不過,呢個問題相信好快可以解決,因為廣州珠江新城已經試行引入過百台智能配送機械人,呢啲機械人可以喺5-10分鐘將外賣送到指定樓層,相信之後嘅快遞、零售亦有望由機械人送上門。

宜家廣州珠江新城多數甲級高層商務寫字樓規定,外賣員送餐唔可以進入辦公區,外賣會統一放喺一樓大堂等打工仔們自行領取。但咁樣唔單止會增加打工仔拎外賣嘅時間,仲會導致拎錯、拎漏外賣嘅情況發生。上個月尾廣州舉辦咗CBD商寫立體智慧城市項目啟動儀式,廣州珠江新城範圍內嘅15個甲級寫字樓實驗試引入過百台智能配送機械人,呢啲機械人差唔多1米高,佔地相當於兩個成年人大細。只要掃描機械人屏幕上嘅二維碼,輸入相應嘅收貨樓層、收貨人手機號碼,機械人嘅櫃門就會開啟以便放置外賣。

機械人會事先通過物聯網打通寫字樓嘅門禁、電梯系統,跟住,機械人就可以用安全速度勻速滑行,自行過門禁、入電梯、避障礙物,仲會讓路俾其他人添。機械人到達指定樓層後,會發送短訊或打電話提醒收件人,配送完畢後,機械人又會自己搭lift落返一樓大堂接下一個order。研發、生產呢批機械人嘅阿爾華(廣州)科技有限公司嘅產品運營負責人表示,智能配送機械人出現喺廣州CBD寫字樓,係為咗解決兩個問題:一係疫情下嘅免接觸需要;二係為商務樓嘅白領節省時間,提供便利。

圖:羊城晚報