香港出名工時長、壓力大,而美國一間手機保安技術公司近日公布嘅2020年工作生活平衡(work-life balance)城市排行顯示,香港嘅多項數據係全球50個城市中最差嘅一批,整體排名第45位。

呢個排行榜揀咗香港、新加坡、首爾、倫敦、巴黎、東京等共50個城市評分,主要由各城市嘅工作壓力、社會保障、城市是否宜居、新冠肺炎影響4大部分組成,涉及每周工時、過勞人口比例、空氣污染指數同埋預計失業數字等19項因素。其中,挪威奧斯陸(Oslo)整體評分為100分滿分,係工作生活平衡最好嘅城市,而排名包尾嘅係首爾,只得1分。

至於排第45位嘅香港整體評分只有57.8,其中「每周返工及通勤時數」有成50.1個鐘,過勞人口比例(即平均每周工時超過48個鐘)更高達29.9%位列榜首。香港另外一個表現最差嘅項目係空氣污染指數,只得25分,此外快樂指數同樣唔及格,排倒數第2。

圖:香港商報