「大學聯招辦法」(JUPAS)將會係下個月9號截止申請,唔知各位中六嘅同學揀好科未呢?如果你仲苦惱緊點樣排「Band A」,或者連20個課程都未揀好,咁你就要睇睇以下呢3個由學友社學生輔導顧問吳寶城先生比大家嘅Tips喇。


按入學難度排「Band A」

同學可以按入學難度排「Band A」,A1可考慮入學難度最高嘅課程,而A2同A3就分別選擇「有把握」同「最有把握」嘅課程。同學可參考科目過往嘅收生成績去判斷入到該課程嘅機會,如果預計成績高過Lower Quartile,其實已經相當穩陣。


了解清楚計分方法


相信同學係揀科嘅時候都會參考課程過往嘅收生成績,但同學記得留意心儀嘅大學同課程嘅計分方法,因為不同課程會有不同計分方法,例如:BEST 5、BEST 6、4C+2X、以及中+英+3X。而港大、中大同理大嘅計分方法更有唔同,考獲5係計5.5分,5*係計7分,5**係計8.5分 。


為自己確立大方向

喺放榜之後每個同學都有一次「5進5出」嘅改選機會,去重新編排自己嘅課程選擇。不過同學千其唔好有「到時再算」嘅心態,因為放榜後「兵荒馬亂」,同學除咗會受情緒影響之外,更未必有足夠嘅時間同空間作全盤嘅考慮,所以同學應該盡早諗好一個大方向,為未來嘅升學做足準備。


圖片來源:香港電台