結婚係兩個人嘅事,如果結婚當日得返一個人,都真係幾淒慘。上海浦東有位醫生新郎,因為醫院入面有人確診新冠肺炎,被逼返工作崗位並隔離,婚禮上只有新娘在場,一對新人只能夠隔空舉行婚禮,為抗疫作出犧牲。

新郎係上海浦東醫院嘅醫生,就係佢準備結婚前,同院嘅一位醫護人員確診新冠肺炎。新郎一覺醒來,發現醫院打咗十幾個電話俾佢,叫佢即刻返醫院。由於情況危急,新郎同兩位同事伴郎都要留喺醫院。但婚禮無辦法取消,新娘只能默默流眼淚自己到會場。婚禮上,新娘神情落寞,新郎喺醫院身穿禮服,透過視像通訊出現:「這次疫情影響,我沒辦法來到現場。」新娘聽到又忍不住哽咽,但佢表示:「有點遺憾,但能夠理解,也願意支持他」。

喺新郎隔離期間,一對新人每日只能夠用視像通話一解相思之苦,互相分享生活、打氣。好在無幾耐,新聞證實浦東醫院全體醫護人員第一次核酸檢測結果皆呈陰性,新娘期待同丈夫重逢,而新郎亦表示結束隔離後,會為妻子補上未能喺婚禮交換戒指、唱歌嘅遺憾。呢場一個人嘅婚禮引來大批網民留言,有人祝福佢哋長久、幸福,亦有人感謝佢哋為抗疫犧牲。

圖:澎湃新聞