雖然呢個世界上有好多愛護動物嘅人,但如果要親自出手救一啲比較兇猛嘅動物,例如鯊魚咁,就未必人人可以做到。澳洲一個11歲嘅小妹妹Billie Rea,遇到鯊魚仔被困,諗都唔諗就徒手抱起鯊魚,再放生佢。Billie淡定嘅救援行為被擺上網分享之後,吸引超過400幾萬網民觀看,仲讚Billie:勇敢、冷靜。

Billie事發當日同媽媽去海邊玩,突然佢發現一條被困喺岩石之間嘅鯊魚仔。於是Billie主動走過去抱起鯊魚仔,起初鯊魚仔都有掙扎過,但好快就停落嚟。跟住Billie小心抱住鯊魚跨過充滿青苔嘅岩石,重新將鯊魚放返大海。Billie媽媽話囡囡好似天生有一種直覺,第一時間就發現鯊魚被困,更冷靜營救鯊魚,佢更驕傲咁表示Billie之前就有好多救援動物嘅經驗。

圖:Twitter@abchobart