呢幾年香港麻煩多多，真係要好好向流星許願啦！錯過咗獅子座流星雨？唔緊要，因為年尾仲有雙子座流星雨，預計到時每小時會有140顆流星掠過晚空，非常壯觀！假如你都想向流星雨許願，邊個時間同地點最好呢？一齊嚟睇睇啦！

雙子座流星雨特點

雙子座流星雨係少數母體非彗星嘅流星雨（另一個係出現喺1月初嘅象限儀座流星雨），其母體係小行星3200法厄同。

雙子座流星雨有三大特點：第一，顏色偏白，此外仲有紅、黃、藍、綠等多種顏色；第二，流星體速度較慢，觀賞性高；第三係亮流星較多，經常會有火流星出現。

雙子座流星雨出現日期

雙子座流星雨出現喺2020年12月7日至16日，而香港嘅建議觀測時段係13號同14號嘅晚上9點到第2日清晨嘅6點！

雙子座流星雨觀賞地點

觀賞流星雨最好的地理位置係戶外光污染較小嘅地方，最好視野廣闊，睇到天空嘅範圍愈大，就愈大機會看見流星，例如高山、江河湖海旁邊都係唔錯嘅觀測點。

香港青年旅舍就推介喺大埔大美督同西貢赤徑嘅兩座旅舍，無論喺旅舍入面定附近都有適合散步睇星星嘅地點，睇夠或者太攰又可以返旅舍房間休息，咁就可以舒舒服服咁睇流星雨啦！

鍾意與世無爭嘅話，可以選擇赤徑，赤徑位於西貢半島，喺蚺蛇尖西南面，三面環山，面向赤徑口海面。赤徑並無車路直達，想去遊覽，一係經北潭坳步行1個鐘，一係由黃石碼頭搭乘街渡或快艇前往，夠晒隔涉，可以遠離繁囂，安安靜靜咁觀星！

鍾意方便嘅話，就可以選擇大美督，由大埔坐車前往，大約半個鐘就到！但大美督同大埔市中心都有一定距離，又鄰近船灣淡水湖同八仙嶺郊野公園，光害較低，可作觀星或影星等活動。想觀星同影星，最好到壩頂，因為嗰度無街燈，環境最黑，但要注意安全。

關於赤徑同大美督青年旅舍嘅詳情，可到「香港青年旅舍」FB專頁了解。

圖片提供：香港青年旅舍

雙子座流星雨於12月7日至16日出現，香港嘅建議觀測時段係13號同14號嘅晚上9點到第2日清晨嘅6點！

赤徑位於西貢半島，青年旅舍面向赤徑口海面。

部分旅舍牆上繪上塗鴉，仲好配合赤徑嘅自然環境添。

喺赤徑青年旅舍入面，視野已經好廣闊。

大家亦可以碼頭附近，欣賞景色。

大美督青年旅舍嘅設計夠晒型格。

大美督旅舍特別設有森林房。

大美督同大埔市中心都有一定距離，又鄰近船灣淡水湖，光害較低，好適合觀星。

想喺大美督觀星，最好到壩頂，因為嗰度無街燈，環境最黑。