新冠肺炎疫情打擊全球經濟,美國俄亥俄州克利夫蘭一間餐廳因疫情緣故,喺感恩節來臨前要第二度關門,上個星期日(22號)係餐廳最後一日營業。點知有客人入嚟只係幫襯咗一支啤酒,但就打賞咗3000美金(約2.3萬港幣)貼士,要餐廳老闆同員工分享共度時艱,老闆Brendan Ring感動不已,喺社交平台分享此事。

Brendan Ring嘅爵士樂餐廳已經開業55年,近期嘅生意因為疫情而大受打擊,佢擔心即將來臨嘅感恩節,會有太多人聚集而令疫情擴散,所以Brendan決定做埋星期日嘅生意之後就暫停營業。而就喺當日中午,有位男顧客入嚟點咗一支啤酒(消費咗7.02美金,約54蚊港幣),就用信用卡埋單離去。Brendan望咗一下收據,起初見到小費一欄寫咗300美金,以為客人寫錯,戴返眼鏡睇真啲,原來係3000美金!佢即刻追上客人問清楚,對方話無寫錯,並希望佢可以同餐廳內4名員工分享呢筆小費,臨走前仲話會喺餐廳重開嗰陣再來幫襯。Brendan之後喺社交平台Facebook上載巨額小費收據嘅相,指員工衷心感謝呢位客人嘅善意,唔少網民亦留言大讚客人嘅舉動窩心。

圖:FB@Brendan Ring,Nighttown