唔知大家有冇認識患有認知障礙症嘅老人家?如果有認識嘅話,不妨同佢地玩以下一套專門設計俾認知障礙症病患者嘅遊戲。

訓練遊戲產品係90後鄭觀平(Ryan)設計,佢依家係一位室內設計師。佢靈機一動設計呢個訓練遊戲,係因為就讀產品設計學士課程時期嘅一個暑假,佢參加咗一個實習活動,佢實習嘅中心主要服務認知障礙症病患者,佢見到老人家做一份份好似小學生做嘅練習,就啟發咗佢設計一套有趣又有功能性嘅遊戲達到訓練效果。

Ryan係Final Year Project(FYP)就以訓練遊戲產品為題目,遊戲係集齊集中力、記憶力、視覺空間能力、辨認物件能力、語言能力及數算能力呢6種功能。其後,仲成為咗佢創業大計,經過不斷嘅改良同完善,成功推出咗一系列本地化、互動認知訓練遊戲,後來喺2018年仲創立咗設計公司Yusha Design,希望可以輆到更多資源,將理念發揚光大。

Ryan認為,只要老人家每日同屋企人或者中心職員玩一次遊戲,當日嘅「營養目標」就達到。設計認知訓練遊戲產品困難之處在於點樣判斷老人家究竟玩唔玩到,最大得著係學識設計產品「以人為本」。另外,Ryan抱持簡單嘅宗旨,設計一套「一拋一拍一筆」遊戲,同時為咗吸引老人家注意力加入唔少懷舊元素,令遊戲生活化,希望老人家唔會抗拒。

圖片來源︰Facebook@ YUSHA Design; H13 Dementia Game set 4 視頻截取


遊戲為拍烏蠅︰訓練數算能力。融合咗拍公仔紙玩法,簡單動作就可以做到飛開反轉效果卡牌效果。


遊戲為茶包豆袋︰訓練專注力、記憶力同手腦協調能力。融合咗老人家喺日常生活中用到嘅茶包,並結合懷舊豆袋遊戲。豆袋用變色料製作,手溫高過31度就會變色,手鬆開就會變翻原本嘅顏色,過程中可以令佢地回想以前童年生活樂趣,神奇變色效果又可以吸引到佢地注意。


遊戲為遊戲畫版︰訓練物品認知能力、視覺空間能力及圖形認知。

分別兩種畫法︰

1. 係畫日常生活中嘅水果

2. 箭嘴迷宮

過程唔會用到marker,令老人家唔容易整污糟隻手,又冇天拿水味,呢個畫板會令顏色1分鐘內消失。