見到陌生人有困難,好多人都會選擇幫手,不過青島有兩位巴士司機一幫就係6年,仲同其他義工齊齊伸出援手。青島有位13歲嘅輪椅少年,每日都要搭K1號巴士去做康復訓練,K1號巴士司機盧振華就每日揹少年上落車,仲聯絡義睦勞模工作室嘅創始人于義睦一齊幫手。兩人同少年仲因此結緣,成為少年嘅契爺添。

由2014年開始,K1號巴士專線開通,盧振華遇到一位媽媽推住坐輪椅嘅囝囝上車,於是盧振華即刻落車抱個小朋友上車。之後,盧振華就同呢對母子結緣,媽媽話俾盧振華知,囝囝出世無幾耐就有重度窒息導致腦部損傷,唔識企、唔識講嘢,而佢每日都要帶囝囝搭K1去做康復訓練。為咗照顧囝囝,媽媽全職留喺屋企照顧家庭,全家只靠爸爸微薄嘅人工過日子。

盧振華心疼小朋友嘅遭遇,於是聯絡自己嘅師傅——義睦勞模工作室嘅創始人于義睦幫手,兩人每日輪流揹小朋友上落車。佢哋對小朋友嘅幫助更擴展到日常生活,為小朋友買嘢食、玩具、書本、衣服,甚至手機,仲會帶佢出門玩、同佢過兒童節、生日等,同小朋友建立咗深厚感情。六年過去,小朋友成長為少年,已經可以斷斷續續講一啲簡單嘅問候語,可以自己企起身行幾十米路,仲會叫盧振華、于義睦做「盧爸爸」、「于爸爸」。雖然只係少少嘅進步,但已經令盧振華、于義睦同一班義工感到安慰。

圖:齊魯晚報