好多動物都好有靈性、好聰明,如果可以好好運用佢哋嘅特長,佢哋分分鐘可以成為人類嘅好幫手!就好似機械發明家Hans Forsberg就利用雀仔鐘意收集汽水樽蓋嘅特性,研發咗一個環保收集機「BirdBox」。雀仔只要喺BirdBox放入樽蓋,BirdBox就會跌啲糧食出嚟獎勵雀仔,網民大讚雀仔變成環保戰士,仲話「將來的環境靠你們」。

Hans Forsberg發現屋企後花園附近住嘅2隻喜鵲,周不時會嘗試用嘴撬開燈籠嘅鐵鎖,想叼走燈籠入面嘅石蠟蠟燭,Hans就覺得佢哋可以做更有意義嘅事,於是發明咗BirdBox。Hans又用咗幾年時間去訓練2隻喜鵲只係叼走樽蓋,呢個過程相當困難,Hans要先要引起喜鵲嘅興趣,定時餵飼佢哋,先鼓勵到佢哋主動嚟搵自己、建立關係。

Hans話未來會繼續訓練喜鵲們,希望佢哋可以收集其他垃圾好似煙頭、跌落地嘅生果等,為環保出力。網民紛紛讚喜鵲們醒目,又指佢哋係環保戰士,由大自然守護大自然。

圖:YouTube@Hans Forsberg