本地社企銀杏館兩年幾前,喺油麻地店推出「平安飯盒」,以「超抵價」每盒12蚊賣俾弱勢社群,每日有幾十人受惠。自疫情爆發以來,銀杏館更一直堅持免費為基層人士派福飯,為有需要嘅人提供溫飽同溫暖。唔好睇小派福飯嘅力量,銀杏館同事Wicky遇到一位無家者,因受派飯者啟發,打消尋死念頭,之後仲成為出色嘅廚師添!

銀杏館喺社交平台發文分享,同事Wicky派飯俾露宿者已經十幾年,佢識得一位廚師,曾經係無家者,生活潦倒嗰陣諗過去尋死,點知當晚就被佢喺公園入面遇到一班派飯嘅義工。佢同義工無所不談,更喺義工身上得到啟發同鼓勵,打消咗尋死嘅念頭,今日更做咗一位出色廚師。銀杏館指,最初推出福飯只係憑住一份信念,為有需要嘅人提供溫飽與溫暖,相信只要憑住愛,可以解決任何困難。就好似「露宿廚師」嘅故事咁,只要向有需要嘅人適時伸出援手,結果可以超乎想像。

最後,銀杏館喺文末表示:「嚴峻疫情下,失業人數飆升,不知有多少類似故事又正在發生?無論出錢或出力,請別看輕自己微小的力量。」

圖:FB@銀杏館