狗狗天生嗅覺靈敏,而加拿大一隻短毛指示犬就憑住佢過人嘅嗅覺,救返走失嘅金毛尋回犬,最後金毛尋回犬成功同主人重聚,真係可喜可賀~

短毛指示犬Banjo本來只係同主人去狗公園玩雪,突然聞到附近樹叢有動物嘅氣味,於是不斷搖尾跑去,主人跟住Banjo就發現有隻金毛尋回犬匿埋喺樹叢入面,全身顫抖,顯得楚楚可憐。Banjo主人嘗試用零食引金毛尋回犬走出樹叢,但唔多成功,最後唯有通知當地嘅動物保護組織嚟幫手。義工帶走金毛尋回犬之後,發現佢有主人,就通知主人Julia嚟接走狗狗。

Julia一聽到消息即刻嚟接走愛犬,狗狗同主人終於重逢。原來呢隻金毛尋回犬叫Louie,已經失蹤咗3日,之前因為同主人朋友一齊出去玩而走失。Julia非常擔心,同屋企人、朋友一齊搵,礙於當時落大雪,唯有被逼放棄搜尋,Julia只好喺社交平台登尋狗啟事。好彩最後Julia都搵得返Louie,佢坦言可以同Louie重逢非常感動,又指如果唔係Banjo,可能未必再見返Louie,仲讚Banjo係「整件事的英雄,很感激牠救了Louie」。

圖:IG@banjo_gwp