相信大家去食brunch(早午餐)都會見到餐單上有牛油果組合嘅套餐,又出咗牛油果奶昔、牛油果醬等,一時之間牛油果成為水果界寵兒,喺打卡界「炙手可熱」。

但大家可能唔知道原來牛油果會浪費地球水源,點浪費法呢?種一隻牛油果需要投放約70升食水,橙同番茄相對都只係分別22升同5升水。某啲地方仲離譜,例如喺智利呢啲乾燥地方仲急增到320升。去年就有報導話,商人為咗牟利,大量將粟米、番薯嘅土地變成果園,仲改動民用食水管,偷水嚟養果田。喺香港可能感受唔到食水可貴,但根據聯合國兒童基金會UNICEF數字,到2040年,全世界就會有6億兒童住喺水資源極度有限地區,即係每四個兒童就有一個無安全食水食用。

墨西哥都有地方因為過度種植牛油果,森林被過度砍伐,令喺林中棲身嘅蝴蝶失去家園,最終仲可能會加劇地球嘅氣候危機。

2016年,澳洲人口統計學家Bernard Salt,就話過年輕人喺牛油果多士上使費太多,會儲唔到錢置業。富商Tim Gurne都向00後年輕人講話:「想買樓,不要再吃牛油果多士」,正式界定咗牛油果嬌貴奢華嘅地位。《經濟學人》仲建立咗「牛油果指數」(The Avocado Index 嚟計算年輕人對置業嘅承擔能力,牛油果真係認真夠風騷﹗

圖片來源︰Upsplash @ Irene Kredenets