本月19日係世界廁所日,係為咗提高公眾廁所環境及衛生水平。香港廁所協會就喺18日舉行咗「香港最佳公廁」頒獎禮,而協會早前就檢視咗全港300幾個公廁。最後,荃灣多層停車場就「洗底」成功,勇奪金獎。

點解話「洗底」成功呢?咁就有段故嘅。2006年荃灣多層停車場公廁就被協會列為「最急待改善公廁」之一,今時唔同往日,荃灣多層停車場公廁「過五大標準(舒適度、可使用性、安全性、清潔度及管理情況)斬80細項」一廁當先。公廁過往係冇窗,令廁所空氣唔流通而被稱為「黑廁」。一年前翻新後,公廁煥然一新,有最新空氣質素監察系統,洗手盤仲放置咗全自動洗手梘液乾手三合一設備,地面濕滑問題得以改善。

而獲得銀獎嘅廁所就係位於調景嶺站公共運輸交匯處公廁,設有傷殘廁所、家庭廁所、老人廁格,非常貼心。另外,「最急待改善公廁」就有大埔大元邨公廁、西貢海濱公園公廁、港澳碼頭公廁、北河街街市公廁及安德道遊樂場公廁,協會會長徐靖世就話上述廁所冇乜清潔致地面濕滑,部份公廁配件鈣化,致其出現滲漏問題及發臭。

此外,協會仲發布咗公廁嘅新設計,如有針對疫情嘅有蓋蹲廁同為咗減少人龍出現而設計嘅女性尿兜。

圖片來源︰香港廁所協會