將一件普通嘅嘢變成識郁嘅機械人,聽落好似科幻片橋段,但喺現實一樣做到!香港城市大學嘅科學家團隊研發出一種神奇噴霧「M-spray」,喺物件表面噴咗M-spray之後就可以將物件變成微型機械人,用於活體內精準傳輸藥物。

由城大生物醫學工程學系副教授申亞京博士領導嘅研究團隊,喺最新一期嘅科學期刊《科學•機械人學》發表一項題為「凝集磁性噴霧將無生命物體轉化為用於生物醫學的微型機械人」嘅研究結果。研究提到嘅「凝集磁性噴霧」,即係M-spray,係一種特別合成、好啲膠水咁嘅磁性噴霧。當物件表面噴上M-spray後,就可以透過磁場驅動,令物件移動。

M-spray可以瞬間穩定咁粘附喺一維、二維甚至三維物件上,所形成嘅薄膜唔會影響物件原本嘅大小、形態同結構,佢仲具有生物兼容性,可以喺有需要嘅時候崩解成粉末,最後被人體吸收或排出體外。已噴有M-spray嘅物件會受磁場驅動,可以喺玻璃、皮膚、木頭或沙礫等表面上,以爬行、翻轉、行走或滾動等唔同方式移動。佢最特別之處在於,物件嘅移動模式可以按需要重新編程。

研究團隊試過喺兔仔身上測試,結果顯示M-spray塗層微型機械人可以準確將藥物送達兔仔胃部,最後施加振動磁場令塗層崩解。申亞京指,希望研究結果可以開拓微型機械人喺唔同範疇嘅發展同應用,例如傳輸、可移動嘅傳感器同裝置等等,特別係應用於喺有限空間內進行嘅任務。 

圖:城大