大家講起大嶼山貝澳,可能第一時間會諗起沙灘和營地,其實貝澳可不只係一個玩樂勝地,呢度有好豐富嘅生態環境,值得大家慢慢觀察同欣賞。

生態價值豐富

近期一班有心人就開設FB專頁「貝澳‧遊憩於山海之間」,以推廣貝澳嘅生態環垃。專頁發言人Nelson表示:「貝澳係香港生態價值好高嘅地方,呢度有沙灘、河口、紅樹林、溪澗、濕地,生態價值好豐富!」

Nelson大學讀環境科學,曾在NGO做保育工作,現時主要做自然教育及導賞等工作,佢自言設立專頁亦受到貝澳一位老師啟發:「以前貝澳公立小學嘅張老師,連同學生合力出版一本有關貝澳貝殼嘅書,覺得呢件事好有啟發性,因為好少老師會同小學生合力出生態書,紀錄當地物種。」加上佢哋眼見貝澳近年不斷發展,聚居嘅人愈來愈多,近十幾年濕地質素下降,今年因為疫情關係,有較多時間,就覺得要做啲事去紀錄貝澳生態。

黃昏紅樹林 水牛浸浴好治愈

講到貝澳生態特點,Nelson話原來有一種動物非常重要,就係水牛:「水牛田其他地方都有,但大部分都已乾涸,貝澳可說是碩果僅存,而且呢度嘅水牛都無落鼻環,同其他地方好唔同。」Nelson又表示:「荒廢嘅稻田變成濕地,適合水牛居住,加上以前貝澳發展唔蓬勃,水牛數目逐漸增加,佢哋管理下嘅濕地,植物唔係單一物種,慢慢發展出一個生態系統,呢一樣係最有價值和有趣嘅地方!」

其中一種因為水牛而出現嘅物種就係牛背鷺:「因為有水牛嘅存在,所以吸引好多同水牛有關嘅雀鳥,佢哋都與水牛有共生關係,例如牛背鷺就係一例,佢哋鍾意食青蛙,水牛行過濕地,青蛙就會彈起逃避,牛背鷺就會乘機出動覓食;另外,水牛身上有蚤,而牛背鷺就會幫佢哋捉蚤。」

假如大家都想睇牛牛,Nelson建議大家可以喺黃昏時分到紅樹林(近鹹田新村及河口),呢個時候開始水退,水牛會到此浸水散熱,睇住水牛「浸浴」,「成件事好療愈,水牛全部都好自由,係香港獨有嘅景象!」

植物方面,Nelson表示貝澳嘅田字草亦值得留意:「田字草形狀就好似一個『田』字,因而得名,呢種厥類植物喺香港很多地方都搵唔到,不過喺貝澳仲有好多,係貝澳濕地嘅代表。」

連繫貝澳人 齊保護環境

Nelson坦言,明白城市發展好難單靠一個專頁而改變,而香港人對生態保育嘅興趣不大,亦好難一下子改變。佢哋設立呢個專頁,最大目的係想連繫貝澳嘅居民,Nelson表示:「其實住喺貝澳嘅人,都好鍾意呢個地方,享受呢度嘅自然環境,希望專頁可以令貝澳人了解及鍾意貝澳嘅自然生態,令佢哋想保存呢片地方,大家齊心合力令環境乾淨啲,設施有改善,就已經好好!」

圖片提供:FB@貝澳‧遊憩於山海之間


貝澳係香港生態價值好高嘅地方,呢度有沙灘、河口、紅樹林、溪澗、濕地,生態價值好豐富!


棄耕農地經過年年月月漸漸變了一片的沼澤繼而形成濕地生境。


貝澳可能是香港最後最大而完整的水牛聚居地!


水牛大哥在洗澡,非常治愈的情景!


前方係牛背鷺,後方係中白鷺,大家唔好搞錯呀!


因為水牛行走時,會令草叢中嘅昆蟲跳起,方便牛背鷺揾食。


貝澳濕地有很多好似四葉草嘅植物,其實叫「田字草」。


久違嘅稻田近期亦重現貝澳。