相信好多家長帶小朋友去公園玩都好唔放心,好驚污糟,見到佢地執樹業、靠近昆蟲就會「上身」咁驚呼。《科學進展》一篇文章就打破咗我地對公園污糟嘅觀念,芬蘭赫爾辛基大學團隊研究就發現,小朋友到草地上玩一個月就可以改變佢地腸道同皮膚上微生物嘅多樣性,免疫力會變好。

哩個研究團隊就比較咗城市中10個唔同嘅日托中心,並探測其中設有500平方米遊樂場嘅中心周圍嘅環境微生物,並追蹤其中75個3到5歲嘅小朋友身體情況。當中有啲遊樂場係標準混凝土同礫石組成,另外就有4間中心就劃分咗部分地方加入草地同矮灌木,即綠化咗嘅遊樂場。

研究團隊用28日時間(實驗前後及期間)抽取所有小朋友皮膚同腸道微生物樣本檢驗,就發現有喺綠化遊樂埸玩過嘅小朋友,微生物多樣性比只喺混凝土遊樂場玩嘅小朋友有所增加,呢個特徵就同整體健康的免疫系統有關。

團隊就分析,有郊遊同有喺綠化遊樂場玩嘅小朋友身上嘅 γ‐變形菌綱 (Gammaproteobacteria) 都有所增加,而呢類菌係可以增強皮膚免疫防禦能力,亦可以增加血液中有益嘅免疫分泌,呢啲發現都同免疫性傳播疾病有關。

資料來源︰Science Alert, Daycares in Finland Built a 'Forest Floor', And It Changed Children's Immune Systems, 22 October 2020

圖片來源︰Unsplash@Leo Rivas