大家有冇睇過《玩轉極樂園》(Coco)呢﹖電影以墨西哥「亡靈節」為背景,暗語「真正的死亡,就是沒有一個人記得你」,講死亡後嘅生命意義。咁迎接死亡嘅過程你又點睇呢?本港伊利沙伯醫院就有「死亡天使」,甚至俾人話係「死神」,佢地職責就係令病人死亡之前可以同屋企人朋友好好「善生、善終同善別」,做到生死兩相安。

「死亡天使」喺一點光

所謂嘅「死亡天使」係伊利沙伯醫院中央護理部為加強臨終病人照顧所立嘅一個護理團隊。老人科外展護士吳樂欣同內科護士鄺文姝就係其中一員,佢地都係四年前加入呢個團隊,能為病人好好善終成為佢哋使命,佢哋亦都冇後悔加入呢個團隊,種種經歷令佢哋可以坦然面對死亡,佢哋就好似病人嘅「一點光」,殊不知病人都點燃咗「死亡天使」成為光嘅決心。

冇沮喪只有得到

吳樂欣表示︰「工作只有累,沒有沮喪。」工作注定係會俾負面情緒包圍,病人同家人總會有心情唔好嘅時候,但佢都冇諗過放棄。她仲話,一位伯伯原先住九龍醫院,醫生仲話伯伯可以出院,伯伯就打電話俾太太,吩咐太太煮粥俾佢食。但係情況就事與願違,伯伯突然身體轉差,即時轉到伊利沙伯醫院,太太因煮唔切粥慚愧內疚。經過同事之間互相協調同配合,有同事為太太準備咗車床,瞓喺伯伯身邊,又鼓勵太太煮粥,同事又用海綿棒沾一啲粥放喺伯伯口中,俾佢食完可以安心離世,最後二人牽手度過伯伯最後時刻。呢件事令到吳樂欣好安慰同感動,對自己工作感到自豪。

疫情處處有真情

鄺文姝就話,就算面對過好多死亡,都冇麻木,反而令佢更加重視死亡過程質素。佢又話,疫情令理所當然嘅事變得遙不可及,一位婆婆不停穿梭伊利沙伯醫院同九龍醫院,但女兒冇得探病。病房同事知道後,同醫生反映,經過商討,醫生批准恩恤探訪。當婆婆彌留之際,女兒亦表示媽媽係一名基督徒,於是病房同事就聯絡院牧部到病房臨床關顧,死別之時,女兒、院牧部同事都喺婆婆床邊祈禱,女兒事後非常感激。鄺文姝仲話,疫情當下感受到醫院,出力為病人做到「全人、全隊、全情以及全家的照顧」,令離逝嘅人可以安息,在世嘅人得到撫慰。

正如《玩轉極樂園》(Coco)所講,真正嘅死亡係遺忘,而呢兩位「死亡天使」就係病人同家人嘅橋樑,令在世同離世嘅人嘅情感可以美好延續。

圖片來源: Facebook@伊院通 - Q E H 員工資訊台