醫護人員有時忙住救人,真係要餓足成日無停手,佢哋嘅辛勞絕對值得我哋尊敬同體諒!近排內地社交平台流傳一段片,影到幾個醫護人員喺救護車入面食香蕉,有網民狠批佢哋唔專業,無視病人安危,亦有網民體諒佢哋長時間工作要補充能量。而片入面嘅醫生回應指,佢哋當時因為已經連續工作咗7個鐘頭,大家都飢腸轆轆先食蕉充飢,但佢哋一直都有留意病人嘅情況。

呢段片發生喺河南一架急救轉運車入面,片入面嘅幾個醫護人員圍住病人而坐,有醫護人員拉低口罩飲水,仲有人食香蕉,佢哋不時指住面前嘅機器討論。有網民即刻留言痛批:「胃口可真好,這就是醫者仁心嗎」、「急救車上吃東西,還救人不救了」;不過亦有網民心痛醫護人員:「有時間誰願意坐在救護車上吃香蕉」、「我要是家屬一定主動給他們買好飯,這樣才能有力氣救人」,更有網民反駁惡意批評嘅人:「所以醫生護士都是鐵打的?不用吃飯?」

內地有媒體輾轉聯絡到當時在場嘅阜外華中心血管病醫院李建朝醫生,李建朝表示嗰次係一次長途急救轉運,由於病人急性心肌梗塞,當地醫院嘅設備技術難以支持治療,所以需要轉運到阜外華中心血管病醫院。而李建朝當時接到求救電話即刻帶住團隊出發救援,上午10點出發,搭車去現場都用咗2個鐘,再喺現場急救2個幾鐘,直到回程路上已經連續工作咗7個鐘,大家體力消耗太大。而時間唔允許佢哋停車食飯,惟有喺路上買啲香蕉、麵包、水。李建朝指,當時病人情況已經穩定落嚟,雖然佢哋食緊嘢,但視線就一直留意緊監測儀,時刻關注病人情況。

而病人兒子得知事件亦回應指,一班醫護人員當日上午過來搶救其父親,滴水未進,路上仲同佢講解父親各項指標出現好轉,叫佢放寬心食啲嘢墊肚,返到鄭州再繼續幫佢父親做手術。佢話對醫護人員充滿感謝,表示佢哋唔應該遭受咁嘅誤解。

圖:網上圖片