近日大家逛天水圍，都會發覺多個領展商場和街市都滿布可愛的公仔，原來這些都是出自插畫師Isabel Tong的手筆，她筆下的角色「Isatisse眼袋女孩」，是一位生活在香港的女孩，因工作忙碌而長了一雙大眼袋，以幽默的生活態度為大家帶來歡樂。

決心自立門戶

Isabel Tong表示，自細就喜歡畫畫：「畫畫時能夠將一啲本來沒有的東西創造出來，就好似自己創造一個世界出來咁！」Isabel畢業後打過幾年工，做時裝設計、玩具設計，不久前看到朋友做自己品牌，認為自己都可以，於是開始做自己的品牌，因為自己喜歡插畫，就將插畫放到產品之中。不過佢都坦言，開頭都有啲掙扎；「因為本來有一份穩定工作，收入又ok，怕將來自立門戶，財政上會有困難！不過無論如何我都想試吓，唔做我會後悔。」

創作靈感源自生活

Isabel創作嘅「Isatisse眼袋女孩」，同香港嘅女孩一樣，平日忙碌的生活令佢哋都有一雙標誌性大眼袋。佢表示眼袋女孩嘅創作靈感及題材源自自己嘅日常生活：「香港人雖然終日營營役役，為口奔馳，但一有時間佢哋就會搵方法令自己可以開心吓，然後繼續生活。我希望透過眼袋女孩，能夠將歡樂帶俾香港人，當大家見到呢個女仔嘅時候可以會心微笑。」

講到創作靈感，一方面佢會將個人經歷投射到角色之中，另一方面，當佢聽到其他人分享嘅故事，會加上自己幻想，從中取得靈感。

對於其他人想從事創作嘅朋友，佢建議大家要放多啲自己嘅作品上社交平台，參加多啲唔同嘅展覽，擁躍參加各種活動，為自己爭取多些機會。

就好似今次「Isatisse眼袋女孩」首度同商場聯乘合作，對佢嚟講就係一種新嘗試，Isabel話：「平時我畫嘅作品比較細幅，但今次畫作成品放到好大，好有新鮮感，覺得特別興奮。」不斷接受挑戰，不斷嘗試新事物，呢個就係Isabel嘅創作之道！

圖片：LOOOP.HK、FB@Isatisse by Isabel Tong

Isabel唔單止同領展商場合作，更曾代表香港出席Seoul Illustration Fair、Tokyo Design Festa，成為香港之光！

Isabel創作嘅「Isatisse眼袋女孩」，同香港嘅女孩一樣，平日忙碌生活，搞到有個大眼袋。

Isabel將佢哋創立放入產品之中。