上一次嘅土瓜灣深度遊帶大家去過宋王臺,今次第二彈,變‧龍城社區文化主任Crosby就會帶大家逛街街。

第一站係炮仗街,原來呢度真係同炮仗有關架!Crosby表示:「喺土瓜灣工業全盛時期,呢度的確有一間炮仗廠,名為廣萬隆炮竹廠,由東莞商人陳蘭芳創立於1908年,全盛時期整間廠有4千名員工。」不過到咗1967年,港英政府禁止市民燃放煙花及炮仗,炮仗廠隨之而沒落,但呢一帶開始發展輕工業,令到民生需求大增,慢慢發展成街市及大牌檔。

呢一帶仲有好多小店,其中垣記雞蛋卷創立於1966年,幾十年嚟都唔假手於人,佢哋做法係最古老,用明火去煎烘蛋卷,一定要將鐵皮烘熱,然後將蛋卷配方倒上,再慢慢烘,烘完一邊再烘另一邊,然後再捲起,「其實這種做法用多很多時間,但做出來嘅蛋卷水份收得更乾,食起嚟亦更加鬆脆。」Crosby表示。

至於土瓜灣嘅地標,可能就係十三街,喺上世紀50年代尾,有大量內地移民嚟到香港,令到香港住屋需求急升,當時發展商就將十三街呢塊地皮發展成唐樓,興建現時所見嘅十三街唐樓群。

十三街其實充滿特色,Crosby表示:「因為十三街毗鄰啟德機場,樓高受到限制,最高只有7層。而十三街最有趣嘅地方,就係裡面有十一條街都用神獸命名,例如鷹揚街、鵬程街、鶴齡街等等。」另外,由於十三街係一條私家街,泊車上唔使擔心違例泊車嘅問題,吸引大量車房進駐,曾經有實習學生根據非正式統計,整個十三街總共有超過二百間車房架!

假如大家想對土瓜灣及九龍城有進一步認識,可以到「九龍城主題步行徑」FB專頁慢慢睇!

鳴謝:躍變‧龍城、九龍城主題步行徑