疫情期間港人冇得去旅行,就轉而去郊野露營解「被困之苦」。近日就有網民喺社交網站批評,太多人湧入塔門,令到牛牛苦不堪言。

FB專頁「西貢牛」就話,露營客去塔門除咗冇以禮相待牛,亦都冇好好錫住自然環境,令到草地變得貧瘠,寸草不生,變相令牛牛自生自滅,有義工就因此自發組織運草俾牛牛食。

另外,有網友就分享咗喺塔門見到露營客對一隻成年牛態度非常惡劣,仲令到佢頭部留血。事緣網友聽到牛大叫聲,行埋去睇就見到有個男人一手抓住牛角,一邊嘅年輕人就用木棍敲打,試圖嚇走佢。除咗暴力對待外,有一班女士想阻止牛接近,出動埋噪音滋擾,專登加大hi-fi音量,令到該名網友好愁。

市民支持本地遊同時,都要愛護環境,尊重動物,唔好糟蹋動物嘅居所,大家一齊享受自然風光至啱﹗

圖片來源︰Facebook@西貢牛


草地光禿禿,岩岩巉巉,牛牛點住得落。


義工喺草地執到好多煙頭,真係牙煙﹗


義工運草去塔門,唔忍心見到牛牛過得咁慘。