邊個話打機賺唔到錢?內地雲南有個18歲少年撒燁,佢就係靠打機成為屋企經濟支柱!撒燁患有先天性肌肉萎縮,全身只有手指可以郁,即使醫生話佢只能夠活到22歲,但佢依然靠自己嘅努力訓練手指肌肉,做埋電競主播,好好享受生活。

撒燁7歲嗰陣就確診先天性肌肉萎縮症,企唔到,手腳亦伸唔直,全身最靈活嘅只有手指。佢因為行動不便已輟學多年,出門要用小朋友嘅玩具車代步,又或者要爸爸揹。父母為咗照顧撒燁,放棄外出打工,只係留喺村內耕田,賺取微薄嘅收入。父母驚撒燁成日留喺屋企會悶,就買咗部手機俾佢解悶,自此扭轉咗撒燁嘅一生。撒燁透過手機接觸電競遊戲,開始愛上打機,每日練習打機技術,間中仲做埋打機直播。不過自從撒燁嘅嫲嫲病咗,外加姐姐嘅學費,本來已經唔富裕嘅家庭變得更加捉襟見肘。為咗減輕屋企嘅負擔,撒燁開始做直播嚟幫補家計,誰不知反應都幾好,網絡直播平台同熱心人士仲送咗佢一部電腦,從此撒燁就正式成為電競主播。

雖然人前風光,但對於患有肌肉萎縮症嘅撒燁嚟講,佢嘅每一步都比普通人艱難:「別人看不到我私底下的努力。我堅持了一年去訓練,付出很多才能做好,沒想過放棄。」好在努力係有回報嘅,唔夠兩年時間,撒燁就擁有38萬粉絲,仲係知名電競賽事嘅冠軍,月入過萬,已經成為屋企主要經濟支柱。曾有網友想捐款俾撒燁,都被佢一一拒絕。雖然醫生話佢最多只能活到22歲,但撒燁無放棄自己嘅人生:「盡自己所能去做,積極向上、好好享受生活,做好自己的事情。」

圖:中新網