早前內地媒體報道一宗罕見新聞,一名大學生因病身故,欠下巨額醫療費用,醫院因死者父母無力償還欠款遲遲唔肯開死亡證明,導致死者遺體足足被冰凍咗17年咁耐。有關報道出街後引起社會關注,有好心人捐出善款助死者家屬取回死者遺體下葬。死者母親幫兒子舉行告別儀式後,打算將善款退回,等其他更有需要嘅人獲得幫助。

死者李奇樂喺2003年因腹痛到上海交通大學醫學院附屬新華醫院睇病,當時被確診為急性胰腺炎,短短53日後就不治離世。而李奇樂喺住院期間一共欠下醫院約人民幣60萬(約港幣70.7萬)醫藥費,無奈死者家貧,其父母東拼西湊都只能夠勉強湊到40萬(約港幣47萬)。雖然死者母親承諾會盡快還款,但醫院唔接受,將佢告上法庭追討欠費,仲堅持要家屬還清所有款項之後先肯開死亡證明。而李奇樂嘅遺體輾轉被送往殯儀館冰凍,殯儀館之前更要求死者家屬交付冰凍多年嘅保管費20萬(約港幣23.5萬)。由於死者父母年事已高、收入微薄,實在無力負擔,令死者嘅遺體足足冰凍咗17年無法取回。

呢單新聞引起社會廣泛關注,有好心人同情死者母親嘅遭遇,霸氣捐出20萬人民幣,俾佢去殯儀館取出死者遺體安葬。死者母親表示佢已經幫替兒子舉辦告別式,而殯儀館考慮到佢有經濟困難,減免咗一半嘅屍體防腐保管費。所以死者母親打算將20萬善款退回,等其他更有需要嘅人獲得幫助。

圖:紅星新聞