有非牟利團體舉辦咗一個名為「玩」出香港HK@APEC遊戲設計比賽,吸引本港逾百名中學生參加,嚟自唔同中學嘅學生各自組隊參賽,發揮佢哋嘅創意去設計一款關於貿易嘅桌遊。今次桌遊設計比賽由5名皇仁書院中五學生組成嘅隊伍「KOMERCO」奪冠,佢哋設計嘅遊戲以真實事件為參考藍本,玩家透過唔同功能嘅遊戲卡,用金幣、資源去交換原材料,製成唔同物品,從而獲得分數、取得遊戲勝利。

由太平洋經濟合作香港委員會(HKCPEC)主辦、青年成就香港部(JAHK)協辦嘅「玩」出香港HK@APEC遊戲設計比賽,要求學生運用創意去設計一個關於貿易嘅桌遊,從而令學生可以認識公平貿易、了解亞太區經濟合作組織嘅發展,以加深佢哋對世界營商環境認識。皇仁書院隊伍代表張競丰表示,佢哋喺創作中途遇到唔少困難,合作嗰陣難免意見相左,印刷卡片亦遇上問題,但最後都通過融合唔同組員意見,取長補短交出滿意作品。除咗透過遊戲認識世界貿易外,亞軍聖公會白約翰會督中學嘅參賽團隊,更特別加入勾心鬥角環節,以增加刺激感。遊戲設計為玩家安排咗唔同嘅勝利條件,玩家可選擇私下同其他玩家合作以取得相關資源,亦可能要勾心鬥角爭取勝利。

圖:FB@Junior Achievement Hong Kong / JAHK