日日著上唔同款式嘅公主裙,可以話係唔少女仔嘅夢,內地南昌一位暖男爸爸徐睿卿,由愛女4歲開始就幫佢親手縫製各種靚裙,至今已為囡囡整咗超過100條裙,認真令人羨慕!不過,徐睿卿並唔係專業嘅設計師,佢嘅縫製技巧完全靠不斷自學、偷師而嚟。

徐睿卿本來只係一個普通嘅打工仔,佢學整衫係一個巧合。話說佢屋企附近有一位裁縫老師傅,佢因為搵老師傅幫手改囡囡嘅衫而接觸縫紉。然後兩人試過合作整囡囡嘅裙,發現比好多牌子嘅裙更好睇,於是徐睿卿就出主意,老師傅負責車嚟打造囡囡嘅衫。不過就喺囡囡4歲生日嗰年,徐睿卿買好布料先發現老師傅返咗鄉下,為咗幫囡囡打造一件獨一無二嘅生日禮物,徐睿卿就利用屋企嗰部舊式縫紉機自學成材,從此開啟佢嘅縫製之路。

不過,一開始徐睿卿並唔想俾人知囡囡嘅衫係自己整嘅:「我的生活環境不是每個人都願意嘗試新事物,有時候會不想讓人知道我做衣服,因為擔心被批評。」後來喺囝囝嘅鼓勵下,徐睿卿先鼓起勇氣喺網上分享自己嘅作品,結果作品大受好評,亦令徐睿卿成為網紅爸爸。除咗整衫之外,徐睿卿仲一手包辦埋囡囡嘅妝容,將囡囡打扮成各種風格嘅小美人,好似童話公主、優雅名媛、漢服古典美人等。每件衫都係由徐睿卿設計、畫圖樣、揀布、縫製而成,一針一線充滿父愛,徐睿卿表示:「每次看到女兒穿上我做的衣服,就覺得與眾不同,這也是我不斷做下去的動力。」

圖:微博@徐睿卿的黑色日記