由於新冠疫情關係,唔少人都多咗喺屋企自己煮嘢食,意粉、通粉呢類乾糧肯定唔少得。不過,消委會就喺35款乾意粉樣本入面,發現有23款樣本檢出霉菌毒素脫氧雪腐鐮刀菌烯醇(嘔吐毒素),更有樣本含有昆蟲碎片、金屬碎片等,大家快啲睇下自己屋企有無呢啲意粉樣本喇!

消委會主要就市面上常見嘅9款螺絲粉、15款通心粉、11款長條形意粉共35款樣本做測試,發現其中23款樣本驗出嘔吐毒素,當中包括2款供嬰幼兒食用樣本,嘔吐毒素含量由每公斤36至506微克不等。若小朋友攝入大量嘔吐毒素,可能會喺30分鐘內會出現噁心、嘔吐、腹瀉、腹痛、發燒等徵狀。不過,消委會指,樣本嘅嘔吐毒素含量全部低於歐盟設定嘅每公斤750微克嘅上限,所以喺一般食用情況下,唔會對健康造成不良影響。

而35款樣本中全部均檢出輕質異物,包括昆蟲碎片、粉蟎、 毛髮、 金屬碎片、天然纖維、塑膠碎片等,不過消委會表示目前並未有研究指出呢啲雜質會對人體有害,而市民喺食用前亦會經過高溫烹煮,應能消滅大部分細菌,消費者無需太過擔心。值得留意嘅係,有6成半(23款)樣本驗出少量除害劑,其中14款檢出草甘膦。雖然聯合國糧食及農業組織認為,通過膳食攝入草甘膦並唔會構成致癌風險,但草甘膦係被國際癌症研究機構歸類為「可能令人類患癌」嘅除害劑。

圖:網上圖片