香港得天獨厚,擁有超靚嘅海港景色,大家當然要好好珍惜!當局亦盡心盡力去修飾海濱,建設咗多條海濱長廊,而近日港島同荃灣仲增設多個打卡位,等大家住吹海風影靚相,好好放鬆心情。

卑路乍灣休息用地 靚爆登場

位於堅尼地城城西道卑路乍灣海濱休憩用地,喺10月中旬全面24小時開放,佔地約5,900平方米,大家可以從堅尼地城港鐵站A出口向海濱步行約6分鐘就到,而旁邊亦有巴士總站,非常方便

休憩用地提供多項設施,包括遮蔭座椅、綠化園境等。最正係中央位置多用途空間,夠晒寬敞!當中活動平台座椅由運貨時用卡板搭建而成,大家可以發揮創意,按喜好自由組合另外呢度仲有色彩繽紛針織公仔,大家可以同佢哋一齊合照「打卡」。

至於毗鄰休憩用地內陸地段,由非政府機構「堅.農圃」營運開放式社區園圃,全港首個結合水耕、魚菜共生和有機耕種都市休閒農場。首階段設施包括戶外教室、多用途空間和種植架。

荃灣海濱 星座BB任你影

至於荃灣海濱長廊,鄰近港鐵西鐵綫荃灣西站,基本上從荃灣西站D出口出閘就到達,非常方便,向南可以到達海濱花園,向北可以一直行到麗城花園。沿途設有緩跑、卵石路步行徑及專為長者而設的健身設施等,而且旁邊就藍巴勒海峽,可以一邊運動一邊欣賞風景,日落時分可以遠眺汀九橋夕陽西下

依家呢度又多咗一個新景點,因為12星座布置已由灣仔海濱搬到嚟荃灣海濱,荃灣街坊想同星座BB合照,都非常方便啦!

圖片來源:LOOOP.HK

卑路乍灣海濱休憩用地中央位置嘅多用途空間,夠晒寬敞!


休憩用地提供多項設施,包括遮蔭座椅。

活動平台同座椅由運貨時用嘅卡板搭建而成,大家可以發揮創意,按喜好自由組合。


呢度仲有針織公仔,大家可以同佢哋一齊合照「打卡」。

針織公仔色彩繽紛,非常吸睛。


毗鄰休憩用地內陸地段,由非政府機構「堅.農圃」營運開放式社區園圃。

工程圍板上嘅字句,都一樣吸引大家「打卡」。


荃灣海濱長廊最近多咗一個新景點,因為12星座布置已經由灣仔海濱搬到嚟荃灣海濱。

荃灣街坊可以同星座BB合照啦!


荃灣海濱長廊旁邊就係藍巴勒海峽,可以一邊漫步一邊欣賞風景。