塑膠對環境嘅傷害越來越大,最難解決嘅問題在於塑膠無辦法自然分解,宜家保良局唐乃勤初中書院幾個師生嘅發現,就為解決塑膠污染問題帶來曙光。佢哋成功發現一種「大麥蟲」嘅甲蟲幼蟲,可以有效降解塑膠,有關發現更獲大學垂青,並由城大同教大嘅研究團隊接手,繼續深入研究。

保良局唐乃勤初中書院嘅中三學生馮永濤、林子杰、陳昌駿、陳煒森、吳灝謙,喺助理講師陳嘉儀博士嘅帶領下,展開名為「蟲塑世界」嘅研究,最後被佢哋發現大麥蟲(Superworm)嘅消化系統可以分解塑膠。而每條大麥蟲每日可以食0.51mg保鮮紙,或0.34mg發泡膠,並能夠消化塑膠然後排出糞便,起到降解塑膠嘅能力。

喺研究過程中,佢哋遇到唔少挫折,先係研讀外國論文嗰陣遇到好多深奧英文單詞要逐一查字典外,更遇上新冠疫情要停課,被逼中斷研究,仲有收集數據有偏差、「飼料」變質影響研究結果等等。不過一班同學仔屢敗屢戰,最終獲教大同城大認可佢哋嘅研究成果,分別為佢哋完成剩低嘅化學分析同分子分析工序,希望可以搵到有效分解塑膠嘅酵素,為環保出一分力。

圖:大公網