新冠肺炎肆虐全球幾乎成年咁耐,全世界都希望疫苗可以快啲面世,宜家終於迎來曙光,美國疫苗生產商輝瑞(Pfizer Inc.)同德國生物科技公司BioNTech合力研發嘅疫苗,可90%有效預防感染新冠肺炎。喺疫苗成功嘅背後,不得不提幕後功臣——BioNTech嘅創辦人Ugur Sahin,Ozlem Tureci夫婦。

呢對德國夫婦多年嚟專注研究癌症,自今年年初中國出現新冠肺炎疫情後,佢哋即刻派500名員工著手研究新冠疫苗。Ugur 同Ozlem都係土耳其移民後裔,Ugur雖出身寒微,但做醫生係佢自細嘅夢想,佢之後亦成功入讀醫科。Ugur同妻子Ozlem喺大學附屬醫院相識,兩人對醫學研究、腫瘤學都非常熱衷,從此一拍即合。佢哋對研究嘅熱衷程度近乎狂熱,就算喺兩人結婚當日,都只係抽小小時間註冊,然後即刻返實驗室繼續研究。德國企業投資者MIG AG董事局成員Matthias Kromayer形容兩人係「夢幻組合」,又表示,佢哋雖然喺事業上取得極大嘅成就,但就不改平日嘅簡樸作風。

圖:BioNTech