正生書院多年嚟為行為有問題、沉淪毒海嘅青少年,提供教育、工作勞動等社群活動,等佢哋可以返回正軌,重投社會。不過,由於新冠疫情、收生不足等原因,正生書院正面臨財困問題!宜家正生大概只係剩返5個月嘅營運資金,所以校長陳兆焯喺社交平台發起「正生助學計劃」,呼籲社會各界捐款支持正生繼續辦學。而為咗節省開支,學校老師、員工亦自願減薪支持。

陳兆焯喺其社交網站撰文指,受疫情同經濟下調影響,正生書院喺今年所獲嘅捐款跌至新低,學校正處於危急關頭,希望大家可以支持「正生助學計劃」,捐款幫助呢班處於困難嘅正生同學。佢更指出,自己同學校嘅同事都自願減薪三分之一至一半不等,就算係家庭負擔較大嘅員工,亦選擇以「十一奉獻」形式將一成薪金捐俾學校。而今次嘅「正生助學計劃」,陳兆焯表示希望可以集合3000名市民每月捐款100元,等正生每個月有30萬固定收入,而目前已經有超過1200名市民響應支持,期望有更多香港人加入為正生集氣,捱過難關。

如果想捐款支持正生,請瀏覽:https://czsa.asiapay.com/czsa/donation/generalDonationForm.jsp

圖:正生會