唐氏綜合症患者嘅身體狀況比一般人弱,但佢哋嘅意志同恆心一啲都唔會輸俾普通人。美國一位21歲嘅唐氏綜合症患者Chris Nikic,喺上星期六(11月7號)就以16小時46分鐘嘅成績,完成巴拿馬海灘鐵人三項賽,成為鐵人三項運動史上首名完成比賽嘅唐氏綜合症患者,更被列入健力士世界紀錄添。Chris表示,佢嚟緊嘅目標係參加2022年喺佛州奧蘭多舉行嘅特殊奧運會。

Chris嘅夢想同好多人一樣,就係可以買到自己嘅屋企、車,同埋娶一位金髮碧眼嘅老婆。不過佢爸爸就話,如果佢繼續日日坐喺沙發打機,佢嘅夢想永遠無可能實現。於是,喺爸爸嘅鼓勵下,Chris喺3年前開始每日做簡單嘅運動鍛煉,佢更慢慢發現身體越來越靈活,並從運動中得到成就感。

雖然好多醫生、專家都認為Chris無可能完成鐵人三項賽,但Chris用實際行動證明佢哋係錯嘅。比賽當日,Chris喺領跑員嘅陪同下,先後完成游泳3.9km、踩單車180km同馬拉松長跑42km嘅賽事。雖然喺過程中,Chris一度試過喺單車上跌低而令膝頭受傷,但佢仍然堅持比賽。Chris表示,完成比賽唔單止可以證明佢有能力通過比賽,亦都意味住佢可以去實現自己嘅夢想、照顧好自己,同埋鼓勵其他唐氏綜合症患者去追夢。

圖:chrisnikic.com